សូមបង្ហាញជូននូវវិធីធ្វើម្ហូបមួយមុខទៀតដែលមានឈ្មោះថា
កង្កែបបោក ដើម្បីចែកជូនដល់បងៗស្ត្រីមេផ្ទះ
ព្រមទាំងប្រិយមិត្តទាំងអស់ឲ្យចេះពីវិធីធ្វើ កង្កែបបោក
ឲ្យកាន់តែមានភាពឈ្ងុយឆ្ងាញ់។
គ្រឿងផ្សំ៖
- កង្កែប ៤ កាត់ដៃ និងជើងរបស់វាត្រឹមភ្លៅ ជើងចិញ្ច្រាំលាយជាមួយសាច់ជ្រូក
- គ្រឿង ៤-៥ ស្លាបព្រាបាយ (បុកហើយ)
- សាច់ជ្រូកបីជាន់ ៣០០ ក្រាមចិញ្ច្រាំ
- សណ្តែកដី ២០០ ក្រាមបុកកុំឲ្យម៉ត់ពេក
- ម្ទេសឆ្អើរ ៥ ផ្លែ ត្រាំទឹកចិញ្ច្រាំឲ្យម៉ត់
- ខ្ទឹមក្រហម ៣ ដុំចិញ្ច្រាំឲ្យម៉ត់
- ខ្ទឹមស ៣ កំពឹស ចិញ្ច្រាំ
- ខ្ទិះដូង កន្លះចានចង្កិះ (ប្រសិនមិនចូលចិត្តមិនដាក់ក៏បាន)
- ស្លឹកក្រូចសើច ៤ សន្លឹក
- ប្រេងឆា ២ ស្លាបព្រាបាយ
- ទឹកផ្សំរស់ជាតិ កន្លះចានចង្កិះក្នុងនោះមាន ម្សៅស៊ុបរ៉ត់ឌី ប្រេងខ្យង
- ប៊ីចេង ស្ករស អំបិល រស់ជាតិផ្សំទៅតាមចំណូលចិត្ត
- វិធីធ្វើ៖
- ជាការចាប់ផ្តើម អ្នកត្រូវឆាសាច់ឲ្យឆ្អិនជាមុនសិន ដាក់ប្រេងឆាក្នុងខ្ទះឲ្យក្តៅ បន្ទាប់មកដាក់ខ្ទឹមស ខ្ទឹមក្រហមនិងស្លឹកក្រូចចូលឆាបញ្ចូលគ្នាឲ្យឈ្ងុយ
ក្រោយមកទៀតទើបបន្ថែមម្ទេសឆ្អើរ គ្រឿង
ឆាបន្តិចទើបបន្ថែមទឹកផ្សំរស់ជាតិពាក់កណ្តាល
និងសាច់ជ្រូកចូលឆាឲ្យសាច់ឆ្អិនទើបបន្ថែមសណ្តែកដី
ខ្ទិះដូងនិងទឹកផ្សំរស់ជាតិដែលសល់ចូលរួចឆាបន្តិចទៀតជាការរួច
ស្រេច។
- យកសាច់ដែលអ្នកបានឆាឆ្អិនហើយញាត់ចូលទៅក្នុងកង្កែបដែល
អ្នកបានធ្វើរួចឲ្យពេញពោះ និងឡើងប៉ោង
ធ្វើដូចនេះទាល់តែកង្កែបអស់។
- យកកង្កែបដែលអ្នកបានញាត់រូចរាល់មកដាក់អាំង ឬក៍ចៀនទៅតាមចំណង់ចំណូលចិត្តរបស់អ្នកញាំ៕
Post a Comment